AGAL é unha asociación de Lupus en Galicia sen ánimo de lucro que nace o día 28 de xuño de 1997 para buscar unha mellora da calidade de vida das persoas con Lupus. 

A iniciativa xurdiu da unión de varios enfermos de Lupus e tamén familiares e amizades que vían as dificultades que tiñamos que superar as persoas con Lupus.

Cando se creou a asociación o primeiro que desexamos foi ofrecer un punto de encontro para todas as persoas que estaban afectados por Lupus (de forma directa como doentes ou indirecta como familiares e amizades). Pero co paso dos anos as nosas aspiracións foron aumentando aínda que nunca esquecemos esa primeira intención. 

Actualmente pretendemos que todos xuntos fagamos forza suficiente para conseguir a mellora das condicións para as persoas con Lupus, un diagnóstico máis rápido e dar visibilidade tanto entre a poboación xeral como institucionalmente.